Шӯрои амнияти СММ қатъномаи сулҳи Сурияро якдилона қабул кард

Душанбе, 19.12.2015 (АМИТ «Ховар»). — Шӯрои амнияти СММ ба тарафдории лоиҳаи қатъномаи сулҳи Сурия овоз дод. Бино ба иттилои хабаргузории «Интерфакс», ин санад якдилона қабул карда шуд.
Дар ин санад зарурияти эҳтироми истиқлолият, соҳибихтиёрӣ ва тамомияти арзии Сурия дарҷ гардидааст.
Дар қатънома ҳамчунин дар бораи муҳиммияти иҷрои пурраи баёнияи женевагии соли 2012 оид ба Сурия гуфта мешавад. Вобаста ба ин, Шӯрои амнияти СММ гурӯҳеро барои дастгирии Сурия даъват мекунанд, ки фаъолияти дипломатиро барои пайдо кардани роҳҳои ҷилавгирии хушунат миёни неруҳои ҳукуматии Сурия ва мухолифин идома диҳад.
Дар ин санад ҳамчунин муҳиммияти фаъолияти яквақта ҳам дар ҳалли сиёсии бӯҳрон ва ҳам дар оташбас дар Сурия таъкид шудааст. Ин ду масъала бояд ҳар чи зудтар ҳал карда шаванд.
Дар қатъномаи тасдиқкардаи ША СММ, муҳиммияти пешгирии ҳамлаҳои террористии ҷангиёни ДОИШ, «Ҷабҳат ан-Нусра» ва дигар гурӯҳҳои марбут ба ДОИШ ё «Ал-Қоида» низ дарҷ ёфтааст.
ША СММ тарафҳои низоъро даъват мекунанд, ки дастрасии кормандони башардӯстонаро ба минтақаҳои зарардида аз амалиётҳои ҷангӣ таъмин намуда, аз ҳамлаҳои ба аҳолии осоишта ва иншоотҳои шаҳрвандӣ равонашуда худдорӣ кунанд.