Шукурҷон Зуҳуров ба Кувайт сафар менамояд

  Душанбе, 18.12.2015. (АМИТ «Ховар»). — Бо даъвати Раиси Маҷлиси Уммаи Давлати Кувайт ҳайати парлумонии Парлумони касбии мамлакат таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон аз таърихи 19 то 22 декабри соли ҷорӣ ба Давлати Кувайт сафар менамоянд.
          Тибқи иттилои котиби матбуотии Маҷлиси намояндагон Муҳаммадато Султонов зимни сафар дар назар аст, ки Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров дар Кувайт бо нафарони расмии олимақоми ин кишвар, аз ҷумла Амири Давлати Кувайт, Раиси Маҷлиси Умма (парлумон), Сарвазири Давлати Кувайт, Раиси хазинаи хайрияи ин кишвар, вазири корҳои хориҷии Давлати Кувайт ва дигар шахсони расмӣ мулоқот намояд.
        Раиси Маҷлиси намояндагон Шукурҷон Зуҳуровро дар ин сафар раисони кумитаҳои Маҷлиси намояндагон  Ҷурахон Маҷидзода, Олимҷон Салимзода,  Абдураҳим Холиқзода, вакилони Маҷлиси намояндагон Комил Салимзода ва Мирзоанвар Ахмедов ҳамроҳӣ менамоянд.