Сокини Вена аз Дунай беш аз сад ҳазор евро сайд кард

Душанбе, 09.12.2015. (АМИТ «Ховар»).- Дар обҳои Дунайи Вена беш аз сад ҳазор евроро сайд карданд, хабар медиҳад сомонаи «The Local».
Полиси Вена иттилоъ гирифт, ки ҷавоне худро ба оби хунук партофта, ба гуфтаи шоҳидон қасди худкушӣ дорад.
Вале, полис ба ҷойи ҳодиса омада, мебинад, ки ин ҷавони эҳтимолан худкушикунанда аз даруни рӯд пулҳои 100 ва 500 евроиро сайд мекунад.
Ба гуфтаи ҷавон ӯ ният дошт, ки пас аз сайд ин пулҳоро ба полис диҳад. Аммо, намояндагони ҳифзи ҳуқуқ ҳоло қарор накардаанд, ки ин пулҳоро онҳо ёфтанд ё шиновар. Полис ҳақиқӣ будани пулҳоро тасдиқ кард.
Мутобиқи қонуни Австрия ҳар нафаре, ки пул меёбаду онро ба полис медиҳад, аз 5 то 10 фоизи онро мегирад. Дар ҳолате, ки дар давоми як сол соҳиби қонунии пул ёфт нашавад, нафари онро ёфта метавонад пулҳоро пурра  соҳиб шавад.
То ҳол муайян нашудааст, ки ин пулҳо аз куҷо дар об пайдо шудаанд. Дар бораи маблағҳои ҷиноӣ  будани ин пулҳо низ маълумот нест. Бино ба иттилои маркази матбуоти полиси Австрия, дар чанд рӯзи охир хабар дар бораи дуздии маблағҳои калон нарасидааст.