Таҳсили 3 383 донишҷӯдухтари тоҷик дар хориҷи кишвар

     Душанбе, 04.12.2015.(АМИТ «Ховар»).-Дар асоси созишнома ва ҳамкории дуҷонибаи Вазорати маориф ва илми  Ҷумҳурии  Тоҷикистон  бо кишварҳои хориҷӣ  ва стипендияи байналмилалии Президенти кишвар «Дурахшандагон»  дар  5  соли охир  12 ҳазору 453   шаҳрванди Ҷумҳурии Тоҷикистон  дар муассисаҳои олии касбӣ ва  илмии хориҷи кишвар  ба таҳсил фаро гирифта шуданд, ки аз ин теъдод 3 383  нафараш  духтарон мебошанд. Дар робита ба ин масъулини Вазорати маориф ва илми кишвар зимни  баргузории мизи мудаввар  бахшида ба 16-умин солгарди қабули Фармони Президенти Ҷумҳурии Тоҷикистон  «Дар бораи тадбирҳои баланд бардоштани мақоми зан дар ҷомеа»  иттилоъ доданд.
        Ба  иттилои  Фирӯза Ғаниева-сармутахассиси Вазорати маориф ва илми Ҷумҳурии Тоҷикистон  ҳамчунин дар муассисаҳои таълимии ҷумҳурӣ дар айни замон аз 160 ихтисоси амалкунанда, аз рӯйи 33 ихтисос дар курсҳои кӯтоҳмуддат мутахассисон омода гардида истодаанд. «Барои соҳибкасб намудани духтарону бонувони тоҷик омӯзиши касбҳои ошпазӣ, қаннодӣ, дӯзандагӣ, пешхизмат ва устои  компютеру ронандагӣ роҳандозӣ шудааст»,-иброз дошт сармутахассиси Вазорати маориф ва илми Ҷумҳурии Тоҷикистон.