70 ҳолати қонуншиканӣ ошкор гардид

Душанбе, 12.01.2016. (АМИТ «Ховар»).-«Кормандони Кумитаи оид ба корҳои дин, танзими анъана ва ҷашну маросими миллии назди Ҳукумати Ҷумҳурии Тоҷикистон дар давраи ҳисоботӣ зиёда аз 90 маротиба дар шаҳру ноҳияҳои ҷумҳурӣ санҷишҳо баргузор намуда, ҷараёни беш аз 740 маъракаи шаҳрвандонро назорат намуданд. Аз ҷумла, аз тарафи кормандони кумита дар соли ҷорӣ зиёда аз 70 ҳолати қонуншиканӣ ошкор ва парвандаҳои ҳуқуқвайронкунии маъмурӣ тартиб дода шудааст»,- зикр намуд зимни нишасти матбуотии имрӯза муовини аввали раиси кумитаи мазкур Ҷумъахон Ғиёсов.
Дар миқёси ҷумҳурӣ аз тарафи мақоми ваколатдор, шуъбаҳо ва бахшҳо оид ба корҳои дин, танзими анъана ва ҷашну маросими миллии вилоятҳо ва шаҳру ноҳияҳо тибқи маълумоти Шӯрои адлияи Ҷумҳурии Тоҷикистон (то 26.12.2015) 562 парванда оид ба вайрон намудани Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» нисбат ба 568 шаҳрванд тартиб дода шуда, барои чораандешӣ ба судҳо ворид шудааст. Аз 562 парванда 549-тои он нисбат ба 555 шаҳрванд баррасӣ гардида, 13 парванда нисбат ба 13 нафар дар истеҳсолот қатъ карда шудааст. Маблағи умумии ҷаримаҳо 1 миллиону 661 ҳазору 360 сомониро ташкил медиҳад.