Кумаки ширкати «Билайн» ба зарардидагони вилояти Бадахшон

Душанбе, 06.01.2016. (АМИТ «Ховар»). -ҶДММ «Таком» натиҷаҳои SMS-иқдоми хайриявиашро оид ба ҷамъоварии маблағ барои осебдидагон аз офатҳои табиӣ ҷамъбаст кард.
Хотиррасон мекунем, ки 7 декабри соли 2015 дар натиҷаи заминларза дар вилояти Бадахшон наздики 500 хона вайрон шуда, даҳҳо оила бе хона монданд. Beeline барои дастгирӣ кардани аҳолии зарардида ташаббусҳоро амалӣ кард. Барои ҷамъоварии маблағ рақами кӯтоҳи 5555 кушода шуд, ки дар давраи аз 9 то 31 декабр ба суратҳисоб як миқдор маблағ ворид шуд. Ширкати Beeline маводи ниёзи аввалиндараҷаро бо инобати дархост ва машварати ташкилоти башардӯстонаи байналмилалии Фокус, ки бевосита дар ҷойи садама кор мекунад, харид намуд. Маҳсулоти харида ба осебдидагон расонида шуда, ҳоло дар байни онҳо тақсим мешаванд.
Ғайр аз рақами кӯтоҳ Beeline нуқтаҳои ҷамъоварии либоси гарм ва маводи ниёзи аввалиндараҷаро дар ҳуҷраҳои хизматрасонии шаҳри Душанбе ташкил кард. Ба ҳисоби умумӣ анқариб 300 кг ёрӣ ҷамъоварӣ шуд, ки он низ ба Хоруғ бо мақсади тақсимсозии минбаъда, аз ҷумла дар байни зарардидагони кӯчонидашуда равона шуд.