Маҷлиси васеи Шӯрои олимон дар Донишкадаи идоракунии давлатӣ

Душанбе, 08.01.2016. (АМИТ «Ховар»).-Дар Донишкадаи идоракунии давлатии назди Президенти Ҷумҳурии Тоҷикистон маҷлиси васеи Шӯрои олимон бо иштироки кормандон баргузор гардид, ки дар он ҳисоботи ректори Донишкада Абдулхолиқзода Лутфия Абдухолиқ оид ба натиҷаи фаъолияти донишкадаи мазкур дар соли 2015 ва вазифаҳо барои соли 2016 шунида шуд.
Ректори Донишкадаи идоракунии давлатӣ аз фаъолияти солонаи факултетҳои идоракунии давлатӣ, муносибатҳои байналмилалӣ, азнавтайёркунӣ ва такмили ихтисос, Пажӯҳишгоҳи идоракунии давлатӣ ва хизмати давлатӣ, шуъбаҳои таълим, тарбия, кадрҳо ва корҳои махсус, банақшагирӣ ва муҳосибот, хоҷагӣ, кафедраҳои идоракунии давлатӣ, идоракунии захираҳои инсонӣ, илмҳои иҷтимоӣ-гуманитарӣ, идоракунии иқтисодиёт ва молия, технологияи иттилоотӣ ва илмҳои табиатшиносӣ, ҳуқуқ ва хизмати давлатӣ, муносибатҳои байналмилалӣ ва равандҳои сиёсии ҷаҳони муосир, забонҳо, бахшҳои ташкили раванди таълим, мониторинг ва назорати сифати таълим, бақайдгирӣ ва таҷрибаомӯзӣ, тестӣ, робитаҳои байналмилалӣ ва татбиқи грантҳо, бахшҳои магистратура, табъу нашр, маркази тиббӣ ва китобхона маълумоти мушаххаси таҳлилӣ дод.
Дар ҳисобот инчунин оид ба иҷрои самтҳои вазифаҳо ва ҳадафҳои стратегии Ҷумҳурии Тоҷикистон дар курсҳои такмили ихтисоси хизматчиёни давлатӣ, ҷалби мутахассисону олимони шинохтаи ҷумҳурӣ ба ин курсҳо, баргузории чорабиниҳои фарҳангӣ ва мизҳои мудаввар дар донишкада иттилоъ дода шуд.