Паём-дастурамали рӯйимизии устодони ДДХ

Душанбе, 21.01.2016. (АМИТ «Ховар»).- Дар раёсати Донишгоҳи давлатии Хуҷанд ба номи академик Бобоҷон Ғафуров ва 16 факултаву дигар сохторҳои он тамошои оммавии Паёми навбатии Президенти мамлакат, Пешвои миллат муҳтарам Эмомалӣ Раҳмон бо иштироки васеи устодону донишҷӯён ва кормандон сурат гирифт.

Ҷои зикр аст, ки Паёми имсола ба мақоми олии қонунгузори мамлакат ва мардуми шарифи Тоҷикистон дар шароити торафт мураккаб гардидани вазъи ҷаҳони муосир, густариш пайдо кардани зуҳуроти ниҳоят хатарноки асри нав — терроризм ва экстремизм, вусъати бесобиқаи бархурди манофеи абарқудратҳо барои аз нав тақсим кардани ҷаҳон ва вобаста ба ин, боз ҳам печидаву муташанниҷ гардидани вазъи сиёсии сайёра, инчунин шиддат гирифтани бӯҳрони молиявию иқтисодӣ дар бисёр кишварҳои олам пешниҳод мегардад.

Баъди тамошои Паём ректори донишгоҳ Анвар Мақсудов роҷеъ ба нуктаҳои муҳими   Паём андешаронӣ  намуда, ба сохторҳои марбута дастур дод, ки барои амалӣ намудани он нақшаи чорабиниҳо таҳия намуда, тамоми устодон дар соатҳои тарбиявӣ ва таълимӣ мазмун ва моҳияти Паёми Президенти мамлакатро ба самъи донишҷӯён расонанд. Устодонро зарур аст, ки вобаста ба самти ихтисос роҷеъ ба нуктаҳои муҳими Паём мақолаҳои таҳлилӣ намуда, аз тариқи расонаҳои ахбор чоп намоянд.

-Паёми Пешвои миллат бояд дастури рӯйимизии устодону донишҷӯёни донишгоҳ бошад,-таъкид кард А. Мақсудов.