Пулиси Олмон дар ҷараёни амалиёт дар Дюсселдорф 40 нафарро дастгир намуд

Душанбе, 18.01.2016. (АМИТ «Ховар»). — Пулиси шаҳри Дюсселдорфи Олмон дар ҷараёни амалиёти мубориза бо ҷинояткории муташаккил байни ашхоси «африқоию араб» 40 нафарро дастгир намуд, — хабар дод рӯзи якшанбе агентии Ассошиэйтед Пресс.
Мувофиқи маълумоти агентӣ, амалиёт дар 18 муассисаи шаҳр сурат гирифт. Қувваҳои тартиботи қонун 294 нафарро тафтиш намуданд, ки аксарияташон табааи Африқои Шимолӣ мебошанд. Ҳукуматдорон 38 нафар дастгиршудагонро ба иқомати ғайриқонунӣ дар Олмон гумонбар кардаанд.
Қаблан хабар дода шуд, пулиси шаҳри Дюсселдорф рӯзи шанбеи гузашта дар маҳаллаи арабнишини Мағриб барои ҷустуҷӯи қочоқчиёни маводи мухаддир ва кисабурон амалиёти махсусро роҳандозӣ намуд. Маҳаллаи мазкур дар шаҳри Дюсселдорф бо гурӯҳҳои ҷинояткори табааи Африқои Шимолӣ ном баровардааст.
Дар бархе шаҳрҳои дигари Олмон, аз ҷумла дар Гамбург Штутгарт, Берлин, Франкфурти лаби Майн, Нюрнберг, ҳамчунин дар Шветсия, Финляндия, Австрия, Швейтсария ва кишварҳои дигари Аврупо чунин ҷинояткориҳо рух доданд.