Р. Ҳакимзода: «Амонатбонк қарзҳои хурдро бо фоизҳои нисбатан имтиёзноки “Судманд” пешниҳод намуда истодааст»
![](https://khovar.tj/wp-content/uploads/2016/01/Kopiya-IMG_8480.jpg)
Душанбе, 19.0.1.2015. (АМИТ «Ховар»).- «Амонатбонк ба муштариён қарзҳои хурдро бо фоизҳои нисбатан имтиёзноки “Судманд” пешниҳод намуда истодааст. Ин намуди қарз бештар ба кормандони соҳаи маорифу тиб, нафақагирон ва умуман дастгирии сатҳи иҷтимоии мардуми кишвар, бо роҳи ниҳоят содашудаи ҳуҷҷатгузорӣ тавассути филиалҳои «Амонатбонк» дар тамоми манотиқи ҷумҳурӣ пешниҳод шуда истодаанд»,-иброз намуд Ҳакимзода Руҳулло, раиси раёсати БДА «Амонатбонк» имрӯз зимни нишасти матбуотӣ.
Ба гуфтаи Ҳакимзода Руҳулло бонк бо мақсади дастгирии сатҳи иҷтимоии мардуми ҷумҳурӣ, хусусан кормандони соҳаи буҷетӣ, қарзҳои овердрафтиро тавассути кортҳои пардохтии бонкӣ ба роҳ мондааст, ки истифодаи он қулаю дастрас мебошад.
Вобаста ба ин, ҳаҷми пешниҳоди қарзҳо нисбат ба соли 2014 ба 1,5 маротиба зиёд гардида, ба зиёда аз 28 ҳазор дар ҳаҷми 1,3 млрд.сомонӣ (бе назардошти байнибонкӣ) дастраси мизоҷон гардонида шудааст.
Дар баробари ин, «Амонатбонк» дар соли 2015 барои дастгирии бонкҳои ватанӣ, бо мақсади муътадил нигоҳ доштани ҳолати пардохтпазирии онҳо қарзҳои байнибонкӣ пешниҳод намуд.
Қарзҳои ҷудошуда ба соҳаҳои афзалиятноки иқтисодиёти ҷумҳурӣ ба соҳаи кишоварзӣ-21,6%, саноат-19,6%, сохтмон-23,5%, истеъмолӣ-11,4%, тиҷорат-17,9%, нақлиёт-5,2% ва дигар соҳаҳо -0,8% дода шудаанд:
Дар соли 2015 бақияи сандуқи қарзии бонк бо назардошти қарзҳои байнибонкӣ 1,1 млрд. сомониро ташкил медиҳад, ки нисбат ба соли 2014 21% зиёд мебошад.