Роҳандозии корҳои назоратии истифодаи самараноку мақсадноки замин

Душанбе, 18.01.2016. (АМИТ «Ховар»).-«Кумитаи давлатии идораи замин ва геодезии Ҷумҳурии Тоҷикистон ва мақомоти он дар маҳалҳо дар соли 2015 аз рўи нақшаи корӣ фаъолият намуда, қонунҳои Ҷумҳурии Тоҷикистон, фармону супоришҳои Президенти кишвар, қарору фармоишҳои Ҳукумати Ҷумҳурии Тоҷикистонро сармашқи кори худ намуда, иҷроиши онро таъмин намуд»,- гуфт имрӯз зимни нишасти матбуотӣ раиси Кумитаи давлатии идораи замин ва геодезии ҶТ Ятимзода Акбар.

Ҳамчунин номбурда илова намуд, ки кумита дар давраи ҳисоботӣ корҳои баҳисобгирии давлатии миқдори заминҳо, корҳои заминсозии байнихоҷагӣ, тадқиқоти калонҳаҷми хок, корҳои баҳои замин, корҳои тадқиқоти геоботаникии чарогоҳҳо, корҳои бақайдгирӣ ва барасмиятдарорӣ, азнавташкилдиҳӣ ва ислоҳоти ташкилоти кишоварзӣ, ташкили шаклҳои нави хоҷагидорӣ, корҳои назоратии истифодаи самараноку мақсадноки замин, корҳои топографӣ-геодезӣ, харитасозӣ, корҳои делимитатсия ва демаркатсияи сарҳад ва бақайдгирии молу мулки ғайриманқулро дар миқёси ҷумҳурӣ идома дод.