Таъмини китобхонаҳои ноҳияи Б.Ғафуров бо китобҳои тозанашр ва мизу курсӣ

Б.Ғафуров, 16.01.2016. ( АМИТ “Ховар”).- Дар ноҳияи Бобоҷон Ғафурови вилояти Суғд барои иҷрои “Барномаи рушди фаъолияти китобдорӣ дар Ҷумҳурии Тоҷикистон барои солҳои 2015-2016” ва дар ин замина таъминоти китобхонаҳои ҷамоатҳои ноҳия бо китобҳои тозанашр, аз ҷониби мақомоти маҳаллӣ ва бахши фарҳанги ноҳия дар ҳамдастӣ бо Раёсати фарҳанги вилоятӣ тадбирҳои зарурӣ андешида шуда истодаанд.
Тавре ки ба АМИТ “Ховар” аз бахши фарҳанги ноҳия иттилоъ доданд, дар заминаи иҷрои барномаи мазкур дар давоми соли 2015 ба китобхона-бахшҳои ҷамоатҳои ҳудуди ноҳия ба маблағи умумии 11,5 ҳазор сомонӣ 482 китоб, аз ҷумла аз тариқи “Корвони китоб” 133 адад ба маблағи 2,5 ҳазор сомонӣ адабиёти нав харид шуда, дастрас гардид.
Ҳамзамон барои китобхонаҳои ҷамоатҳои Д.Холматов ва Ҳ.Усмонов ба маблағи 13,9 ҳазор сомонӣ мизу курсиҳо харид шуданд.