Ташкилоти қарзии хурд муттаҳид мешаванд

Душанбе, 14.01.2016. (АМИТ «Ховар»). -Раёсати Бонки миллии Тоҷикистон тибқи моддаи 13 Қонуни Ҷумҳурии Тоҷикистон “Дар бораи ташкилоти маблағгузории хурд” ва бинобар иҷро накарданӣ талаботи Дастурамали №197 “Дар бораи тартиби танзими фаъолияти ташкилоти қарзии хурд”, бо қарори навбатии худ аз 12 январи соли равон дархости ҶДММ ТҚХ “Ворух” ва ҶДММ ТҚХ “Рушди обшорон”-ро барои ҳамроҳшавӣ ва азнавташкилдиҳии ҶДММ ТҚХ “Меҳнатобод” иҷозат дод.
Дар робита ба ин, иҷозатномаҳои ҶДММ ТҚХ “Ворух” ва ҶДММ ТҚХ “Рушди обшорон”, ки аз ҷониби Бонки миллии Тоҷикистон барои анҷом додани амалиёти бонкӣ дода шудаанд, бозхонд мешаванд.
Бино ба иттилои БМТ, ҶДММ ТҚХ “Меҳнатобод” вазифадор карда шуд, ки пас аз бақайдгирии давлатии азнавташкилдиҳӣ дар мақомоти масъул нусхаи ҳуҷҷатҳои таъсисотӣ ва дигар санадҳои тасдиқшудаи ташкилотро ба Бонки миллии Тоҷикистон пешниҳод намояд.