Қурғонтеппа: 1 миллиарду 751 миллион сомонӣ барои рушди иқтисодию иҷтимоии шаҳр

Душанбе, 16.01.2016. (АМИТ “Ховар”). -Аз 1 январи соли 2016 дар шаҳри Қурғонтеппа «Барномаи рушди иқтисодию иҷтимоии шаҳри Қурғонтеппа барои солҳои 2016-2020» мавриди амал қарор гирифт. Дар доираи ин барнома татбиқи зиёда аз 130 лоиҳа пешбинӣ шуда, маблағгузории он дар тӯли 5 соли оянда (солҳои 2016-2020) ба ҳамаи соҳаҳо ва аз ҳисоби ҳамаи сарчашмаҳо зиёда аз 1 миллиарду 751 миллион сомонӣ пешбинӣ гардидааст.
Тибқи ин барнома, дар минтақаи саноатӣ бунёди 12 корхонаи истеҳсолӣ дар назар дошта шуда, тӯли солҳои 2016-2020 дар шаҳр сохтмону барқарорсозии зиёда аз 60 иншоот аз ҳисоби буҷаи ҷумҳурӣ, вилоятӣ ва маҳаллӣ ба нақша гирифта шудааст. Сохтмони 2 муассисаи таълимӣ бо 1240 ҷойи нишаст, ки маблағи лоиҳавии пешбинишудаи он 26 млн. 200 ҳазор сомонӣ, сохтмони биноҳои иловагӣ дар 5 муассисаи таълимӣ бо 2280 ҷойи нишаст, маблағи пешбинишудаи он 27 млн. 650 ҳазор сомонӣ, сохтмони муассисаи таълимии томактабӣ бо 120 ҷойи нишаст бо маблағи 2 млн. 300 ҳазор сомонӣ ва дигар биноҳои таълимию табобатии замонавӣ низ дар назар аст.