Вуруди мошинҳои сабукрав ба ҷумҳурӣ коҳиш ёфт

Душанбе, 27.01.2016. (АМИТ «Ховар»). — Соли 2015 вуруди мошинҳои сабукрав ба ҷумҳурӣ нисбат ба соли 2014 баробари 34,8 ҳазор адад коҳиш ёфта, 11,7 ҳазор ададро ташкил дод. Ҳамзамон вуруди амвол ва воситаҳои нақлиётӣ дар соли 2015 нисбат ба соли 2014 баробари 863 миллион доллари ИМА коҳиш ёфт. Дар ин бора сардори Хадамоти гумруки назди Ҳукумати ҶТ Абдуфаттоҳ Ғоиб хабар дод.
Ба гуфтаи номбурда, бархе омилҳо боиси коҳишёбии воридоту содироти амвол гардида, бар асари ин ҷамъоварии боҷи гумрукӣ кам шуд. Сабаби ин, дар навбати аввал, таъсири бӯҳрони молиявии ҷаҳон, ноустувории қурби асъори миллӣ, оқибати офатҳои табий дар ВМКБ ва як қатор омилҳои дигари воқеӣ мебошад.
Дар ҷараёни нишасти матбуотӣ зикр шуд, ки соли гузашта ҷамъоварии боҷи гумрукӣ беш аз 3,5 миллиард сомониро ташкил дод, ки 86,6 фоизи нақшаро ташкил дода, ё баробари 508,2 миллион сомонӣ камтар аст.