Ғалабаи “Хуҷанд” дар бозии чорум
![](https://khovar.tj/wp-content/uploads/2016/02/khujand-cska8.jpg)
Душанбе, 3.02.2016 (АМИТ «Ховар»).- Клуби футболи «Хуҷанд” охирин бозии санҷишии худро пеш аз сафар ба Фаластин дар шаҳри Душанбе бо Клуби марказии варзиши артиш “Помир” баргузор кард. Ин вохӯрӣ бо натиҷаи 2 бар 1 ба фоидаи футболбозони соҳили Сир ҷамъбаст шуд. Дар дақиқаи сеюми вохӯрӣ муҳофизатгари сарбозон Фурӯғ Қодиров ғофилан бо автогол ҳисобро боз кард. Сипас бозингари нави хуҷандиҳо Илҳом Баротов дар нимаи дуввуми вохӯрӣ бартарии “Хуҷанд”- ро афзуд. Ба Фирӯз Раҳматов муяссар гардид, ки ба ду голи “Хуҷанд” бо як гол ҷавоб гардонад. Дар давоми бозӣ муҳофизатгари “Хуҷанд” Далер Тухтасунов дар дақиқаи 36 барои гуфтори дағал бо сардовари вохӯрӣ аз майдон ронда шуд, аммо бо маслиҳати дуҷонибаи дастаҳо ӯро Саидҷон Шарипов иваз кард. Ҳамин тавр, футболбозони шаҳри Хуҷанд баъди се мусовӣ бо “Истиқлол”- и Душанбе (1:1, 2:2 ва 1:1) ва пирӯзӣ бар КМВА “Помир” барои доир кардани мусобиқа бо тими “Аҳли Алхалилӣ”- и Фаластин дар радифи бозиҳои Ҷоми КФО, ки рӯзи 9 феврал мегузаранд, рӯзи 6 -феврал сафар мекунад.