Аввалин ғалабаи Зидан дар Лигаи чемпионҳо

Душанбе, 18.02.2016 (АМИТ «Ховар»).-“Реал”-и Мадрид ва “Рома”-и Италия аввалин дидори худро дар бозиҳои Ҷоми чемпионҳои Аврупо шоми дирӯз анҷом доданд. “Реал” дар сафар соҳибони майдонро маҷбур кард, ки бо натиҷаи 2 бар 0 мағлуб шаванд. Дар нимаи аввал ҳарчанд лаҳзаҳои муносиби голзанӣ вуҷуд доштанд, касе онро истифода накард ва дар аввали нимаи дуввум Криштиано Роналдо ва баъдан дар дақиқаи 86-ум Хессе бо тӯбҳои задаашон сармураббии нави даста Зейниддин Зиданро ба аввалин ғалабааш дар рақобатҳои Лигаи чемпионҳо сарфароз гардониданд.
Дар бозии дигари рӯз “Волсфбург” низ дар сафар “Гент”-ро ба мағлубият дучор кард. Бозӣ ончунон диданӣ буд, ки аз ҷониби футболбозони ҳар ду даста тӯб панҷ маротиба вориди дарвоза гашта, мухлисонро ба ваҷд овард. Дар вохӯрӣ ду маротиба Дракслер дарвозабони белгиягиҳоро маҳзун кард. Макс Крузе муаллифи голи сеюми олмониҳо шуд. Свен Кумс ва Халифа Кулибалӣ ду голи соҳибони майдонро ба самар расониданд.
Бозиҳои ҷавобӣ рӯзи 8 март баргузор мешаванд. Гумон меравад, ки ҳам “Реал” ва ҳам “Волфсбург”вазифаи ба даври дигар гузаштанро аллакай ҳал кардаанд.