Бунёду барқарорсозии 5 пул анҷом дода шуд

Душанбе, 03.02.2016. (АМИТ «Ховар»). — Дар соли 2015 бо истифодаи 24,7 миллион сомонӣ маблағи аз буҷаи ҷумҳуриявӣ барои сохтмони асосӣ ҷудогардида дар 29 иншоот корҳои бунёдию барқарорсозӣ бурда шуда, 6 иншоот бо маблағи умумилоиҳавии 29,1 миллион сомонӣ, аз ҷумла бунёди пул аз болои дарёи Ванҷоб дар километри 456-уми роҳи мошингарди Душанбе — Қулма барои истифода супорида шуданд. Дар ин бора имрӯз, 3 феврал вазири нақлиёти кишвар Шералӣ Ганҷалзода ба хабарнигорон иттилоъ дод.
Бо маблағгузорӣ аз буҷаи ҷумҳуриявӣ бунёду барқарорсозии 5 пул бо дарозии умумии 241 метр анҷом дода шуд.
Бино ба гуфтаи вазир, аз ҳисоби маблағҳои Фонди хароҷоти пешбининашудаи Ҳукумати Ҷумҳурии Тоҷикистон барои корҳои иҷрошудаи барқарорсозии оқибатҳои офати табиӣ дар ноҳияҳои минтақаи Рашт ва Вилояти Мухтори Кӯҳистони Бадахшон 5,1 миллион сомонӣ ҷудо гардид.