Интернатсионализм- омили асосии мубориза бар зидди терроризми байналмиллалӣ, экстремизм ва тундгароии динӣ

Душанбе, 15.02.2016. (АМИТ «Ховар»).- Имрӯз дар боғи фароғатии ба номи А. Мироненкои шаҳри Душанбе бахшида ба рӯзи баромадани артиши Иттиҳоди Шӯравӣ аз хоки Афғонистон чорабинӣ баргузор гардид. Дар чорабинӣ намояндагони ВКД ҶТ ва собиқадорони Иттиҳоди интернатсионалистон иштирок намуда, дар назди нимпайкараи Александр Мироненко ба хотири шаҳидон гул гузоштанд.
Сипас дар Муассисаи давлатии Китобхонаи миллии Тоҷикистон (МД КМТ) дар мавзӯи «Интернатсионализм-таҷассумгари дӯстию осоиштагӣ, омили асосии мубориза бар зидди терроризми байналмиллалӣ, экстремизм ва тундгароии динӣ» мизи мудаввар баргузор гардид.
Дар чорабинии мазкур намояндагон аз: Ҳукумати Ҷумҳурии Тоҷикистон, сафорати Федератсияи Русия дар Тоҷикистон, Маркази тадқиқоти стратегии назди Президенти ҶТ, Академияи илмҳои ҶТ, Вазорати корҳои дохилӣ, пойгоҳи ҳарбии 201-и Федератсияи Русия дар Тоҷикистон ва Донишгоҳи миллии Тоҷикистон иштирок намуданд.
Дар охир видеофилм бо номи «Афғонистон-Қиссаи модар», ки Ҷамъияти умумирусиягии «Российский Союз ветеранов Афганистана» (РСВА) омода намудааст, ба иштирокдорон намоиш дода шуд.