Се намояндаи Тоҷикистон ба узвияти кумитаҳои Шӯрои олимпии Осиё (ШОО) пазируфта шуданд

Душанбе, 17.02.2016 (АМИТ «Ховар»).- Раиси Шӯрои олимпии Осиё Шайх Аҳмад Ал-Фаҳад Ал-Сабоҳ ба унвони Кумитаи миллии олимпии Тоҷикистон номаи расмие ирсол кардааст, ки дар он гуфта мешавад аъзои нави 15 кумитаи ШОО барои солҳои 2015-2019 тасдиқ шудаанд.
Аз дафтари матбуоти КМОТ хабар доданд, ки дар ин нома аз ҷумла омадааст, ки дабири кулли Кумитаи миллии олимпии Тоҷикистон (КМОТ) Баҳрулло Раҷабалиев узви Кумитаи молияи ШОО, президенти Федератсияи футболи Тоҷикистон Рустами Эмомалӣ узви Кумитаи муносибатҳои байналмилалии ШОО ва мудири кулли КМОТ Муҳаммадшо Абдуллоев узви Кумитаи варзиш ва муҳити зисти ШОО интихоб шудаанд.
Шайх Аҳмад Ал-Фаҳад Ал-Сабоҳ дар номаи худ ҳарсе намояндаи Тоҷикистонро, ки аз нав ба узвияти кумитаҳои Шӯрои олимпии Осиё пазируфта шудаанд, табрик гуфта, барояшон барои рушди минбаъдаи ҳаракати олимпӣ дар қораи Осиё барори кор ва комёбиҳо орзу кардааст.