Таиланд ва Ветнам ба Чемпионати ҷаҳон мераванд

Душанбе, 18.02.2016 (АМИТ «Ховар»).- Дастаҳои мунтахаби Таиланд ва Ветнам, ки дар як гурӯҳ бо тими мунтахаби футзали малакат бозӣ доштанд, ба бозиҳои ниҳоии Ҷоми ҷаҳон, ки дар Колумбия доир мегарданд, роҳхат гирифтанд. Таиланд, ки дар бозии гурӯҳӣ бо душворӣ дастаи мунтахаби моро дар сонияҳои охир бо натиҷаи 5 бар 4 мағлуб карда буд, дирӯз дар бозии ¼ ниҳоӣ бар мунтахаби Австралия бо ҳисоби 6 бар 1 ғалаба карда ба чоргонаи Осиё, ки дар Ҷоми ҷаҳон ширкат менамояд, ҳамроҳ шуд. Ветнам ҳам дар ин рӯз бо тими мунтахаби футзали Ҷопон, дорандагони унвони се карат чемпиони Осиё вориди рақобат шуда, дар вақти асосӣ натиҷаи мусбати 3 бар 3-ро комёб шуд ва дар қисмҳои иловагӣ низ натиҷаи мусовии 4 бар 4 ҳосил шуд. Дар натиҷа барои муайян кардани ғолиб дар ин вохӯрӣ силсилаи зарбаҳои баъдибозӣ таъйин гардиданд ва бахти ветнамиҳо дар он хандида, бо натиҷаи 2 бар 1 ғолиб омаданд.
Баъди пирӯзиҳои Узбекистон бар Ироқ бо натиҷаи 3 бар 0 ва Эрон бар Қирғизистон 7 бар 0 чоргонаи иштирокдорони Ҷоми ҷаҳон аз Осиё муайян шуданд.
Пагоҳ дар бозии нимниҳоӣ тими мунтахаби Узбекистон бо Таиланд ва Ветнам бо Эрон ба толори бозӣ медароянд. Дастаҳои мунтахаби Ҷопон, Қирғизистон, Австралия ва Ироқ муборизаро барои роҳхати панҷум аз Осиё дар мусобиқаи байниҳамдигарӣ муайян мекунанд. Имрӯз Австралия бо Ироқ ва Ҷопон бо Қирғизистон вомехӯранд. Ғолибони вохӯриҳо рӯзи 19 феврал барои роҳхати панҷум талош меварзанд.