Нуриддин Давронов: Мақсади “Истиқлол”- ғалаба дар Лубнон

Душанбе, 2.03.2016 (АМИТ «Ховар»).-Капитани клуби футболи “Истиқлол”-и Душанбе Нуриддин Давронов дар суҳбат бо хабарнигори “Ховар” изҳор кард, ки дар вохӯрии даври дуввуми Ҷоми КФО бо клуби “Триполӣ”-и Лубнон танҳо мақсади ғалаба дар назди даста гузошта шудааст ва бозингарон ҳамагӣ барои амалӣ шудани ин мақсад омодаанд.
“-Дар бозии гузашта бо “Алфайсалӣ”-и Урдун дар назди мухлисон мо натавонистем, ки ба пирӯзӣ комёб шавем, ду холи гаронбаҳо аз даст рафт, меҳмонон ҳам имконияти хуби кушодани ҳисобро доштанд. Акнун рӯзи 5 март ба Лубнон сафар карда, сабти бозиҳои “Триполӣ”-ро меомӯзем ва вориди рақобат мешавем”.
Ёдовар мешавем, ки дар гурӯҳи “Б” дастаи “Истиқлол” бозии аввалинашро дар радифи бозиҳои Ҷоми КФО дар варзишгоҳи марказии пойтахт бо тими “Алфайсалӣ”-и Урдун бо натиҷаи 0 бар 0 мусовӣ анҷом дод. “Триполӣ” дар сафар дар дақиқаи аввали вақти иловагӣ аз “Нафт Алвасат”-и Ироқ гол хӯрда, бо натиҷаи 1 бар 0 мағлуб гардид.