Душанбе-мизбони роҳбарони агентиҳои иттилоотии давлатии ИДМ

Душанбе, 15.03.2016 (АМИТ «Ховар»).-Ду рӯз боз Тоҷикистон мизбони иштирокдорони ҷаласаи XXI Шӯрои роҳбарони агентиҳои иттилоотии давлатии Иттиҳоди Давлатҳои Мустақил мебошад. Пагоҳ, 16 марти соли равон роҳбарони агентиҳои иттилоотии давлатии ИДМ аз ҷойҳои тамошобоби Душанбе ва атрофи он боздид ба амал оварда, инчунин дар Осорхонаи миллӣ бо донишҷӯёни донишгоҳҳои кишвар вохӯрӣ баргузор менамоянд.
Ёдовар мешавем, ки Шӯрои роҳбарони агентиҳои иттилоотии давлатӣ 3 ноябри соли 1995 бо Созишномаи ҳукуматҳои давлатҳои аъзои ИДМ бо мақсади мусоидат ба рушди ҳамкории иттилоотӣ созмон дода шудааст. Яке аз вазифаҳои асосии агентиҳои иттилоотии давлатии аъзои Шӯрои агентиҳои иттилоотии давлатии ИДМ маълумот додан ба аҳолӣ оид ба равандҳои ҳамгироӣ дар Иттиҳод мебошад. Шӯрои агентиҳои итилоотии давлатии ИДМ ба масъалаи ҳамкорӣ барои аз худ намудани технологияҳои муосири ВАО ва истифодаи васеи он таваҷҷуҳи зиёд зоҳир менамояд.
Ҷаласаи Шӯрои роҳбарони агентиҳои иттилоотии давлатии кишварҳои ИДМ бори охир дар шаҳри Душанбе моҳи марти соли 2011 доир гардида буд. Он ба масъалаи таҷлили 20-солагии ИДМ ва дигар чорабиниҳои ҷашнии соли 2011, аз ҷумла иқдоми Шӯрои агентиҳои иттилоотии давлатии ИДМ ба ифтихори таҷлили Соли мероси фарҳангӣ дар ИДМ бахшида шуда буд.