Хуҷанд: «Ҷавонон ва равандҳои ҷомеаи имрӯза»-конфронси илмӣ

Хуҷанд, 29.03.2016 (АМИТ «Ховар»).- Дар Донишгоҳи давлатии ҳуқуқ, бизнес ва сиёсати Тоҷикистон дар вилояти Суғд конфронси илмию амалии донишгоҳии олимони ҷавон, аспирантон, унвонҷӯён ва магистрантон таҳти унвони «Ҷавонон ва равандҳои ҷомеаи имрӯза» бо доираи васеи устодону олимон ва донишҷуён доир гардид.
Дар конфронс 46 маъруза мавриди баррасӣ қарор гирифта, ассистенти кафедраи ҳуқуқи конститутсионӣ Кадриддин Сулаймонов дар мавзӯи «Заминаҳои ҳуқуқии мубориза бар зидди ифротгароӣ ва терроризм дар Паёми Президенти Ҷумҳурии Тоҷикистон Эмомалӣ Раҳмон», дотсенти кафедраи сиёсатшиносӣ Шуҳрат Саидов доир ба мавзӯи «Зиракӣ ва ҳушёрии сиёсӣ заминаи раҳоӣ аз фиреби сиёсӣ», ассистентон Ғайрат Бобоҷонов дар мавзӯъҳои «Абӯиброҳим Мунтасир-муборизи барқарорсозии давлати Сомониён»ва Заррина Раҳматалиева оид ба «Иқтисодиёти Тоҷикистон дар шароити буҳрони иқтисодӣ» маъруза намуданд.