Ингрид Терсман: Эҷоди фазои мусоиди сармоягузорӣ барои фаъолияти соҳибкории озод муҳим мебошад

Март 12, 2016 10:34

Душанбе, 12.03.2016. (АМИТ «Ховар»). -«Мубориза бар зидди экстремизм набояд ба иқдому ибтикороти кишварҳо барои эҳтироми ҳуқуқу озодиҳои инсон ва арзишҳои демократӣ халал ворид созад. Мо бо эҳтироми муштарак ба ҳамаи ин арзишҳо бояд ҳамкорӣ ва инчунин ҳамкории байнитамаддунӣ ва байнифарҳангиро ба роҳ монем. Барои расидан ба ин ҳадафҳо бобати инкишоф ва густариши бештари ҳамкории дуҷониба байни ҳарду кишвар тамоми кӯшишҳоро ба харҷ хоҳам дод»,-чунин иброз намуд Сафири фавқулода ва мухтори Шоҳигарии Шветсия Ингрид Терсман баъди супоридани эътимоднома ба Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар назди хабарнигорон.
Ингрид Терсман зикр кард, ки Шоҳигарии Шветсия ва Ҷумҳурии Тоҷикистон аз лиҳози ҷуғрофӣ агар дар масоҳати хеле дур аз ҳамдигар воқеъ ҳастанд, вале дар ҷаҳони муосири имрӯз масоҳат нақши муҳиме надорад, зеро имрӯз тамоми кишварҳои мо ба чолишу таҳдидҳои ҳамсон ва муштарак мувоҷеҳ мебошанд. Зимни суҳбати муфид бо Президенти Ҷумҳурии Тоҷикистон муҳтарам Эмомалӣ Раҳмон бобати он таҳдидҳо ва мушкилот бори дигар таъкид гардид, ки дарвоқеъ мушкилоти марбут ба тағйирёбии иқлим, буҳрони шадиди иқтисодӣ, инчунин таҳдидҳо ва зуҳуроти ифротгароӣ ва ё экстремизм имрӯз аз якояки мо ҳамкории густурда ва муфидро, чӣ дар мабнои ҳамкории минтақавӣ ва чӣ дар сатҳи байналмилалӣ тақозо мекунад.
Ба гуфтаи сафири тозаинтихоб кишварҳои хурд, ба мисли Шветсия, ки аҳолии он наздики 9 миллионро ташкил медиҳад, дар алоҳидагӣ ё дар танҳоӣ ба ҳадафҳои наҷиби худ ноил гашта наметавонанд. Аз ин лиҳоз Шветсия бо ҳамтоёни худ дар Иттиҳоди Аврупо, САҲА ва СММ ҳамкорӣ ва иртиботи судманду муфидро истиқрор намуда, барои беҳтар ва тақвият бахшидани иқтидори худ дар истодагарӣ бар зидди таҳдидҳо ҳамкории хуб роҳандозӣ намудааст. Барои рафъи мушкилоте, ки аз зуҳуроти тағйирёбии иқлим бармеоянд, ҳалли чунин мушкилот барои кишварҳо рушд ва инкишофи энергия аз манбаъҳои таҷдидшаванда хеле муҳим мебошад. Дар ин росто Шоҳигарии Шветсия ва Тоҷикистон ҳамсон ҳастанд. Замоне, ки кишварҳо ба мушкилоти буҳронҳои шадид ва зиёди иқтисодӣ рӯ ба рӯ шудаанд, шароити ҷаҳонишавӣ барои бунёд ва ё эҷоди фазои мусоиди сармоягузорӣ бо фароҳам овардани имконияти фаъолияти соҳибкории озод ва шаффоф барои ҳамаи кишварҳо муҳим мебошад.

Март 12, 2016 10:34

Хабарҳои дигари ин бахш

Нишасти навбатии Гурӯҳи корӣ дар қолаби С5+Олмон баргузор гардид
Тоҷикистон аз созиши оташбас байни Исроил ва Эрон истиқбол менамояд
Сафири Тоҷикистон ба Президенти Малдив эътимоднома супорид
Дар Душанбе тақвияти ҳамкорӣ байни Тоҷикистон ва Қатар дар соҳаи иқтисоду тиҷорат баррасӣ шуд
Сироҷиддин Муҳриддин дар ҷаласаи вазирони корҳои хориҷии давлатҳои аъзои Созмони ҳамкории исломӣ иштирок намуд
Тоҷикистон зарбаҳои неруҳои ҳарбии ҳавоии Амрико ва Исроилро ба иншооти ҳастаии Эрон қатъиян маҳкум мекунад
Роҳбарони агентиҳои давлатии иттилоотии кишварҳои ИДМ дар Санкт-Петербург рушди ҳамкориро баррасӣ намуданд
Дар Душанбе Конфронси байналмилалӣ «Осиёи Марказӣ – меҳвари СҲШ: 25 соли ҳамкорӣ ба хотири рушди муштарак» доир гардид
Дар Корея аз иқдомҳои Тоҷикистон дар самти мубориза бо биёбоншавӣ ва хушкӣ ёдовар шуданд
Дар Душанбе машваратҳои сиёсӣ байни вазоратҳои корҳои хориҷии Тоҷикистон ва Венесуэла баргузор шуд
Байни давлатҳои Осиёи Марказӣ ва Чин Паймони ҳамсоягии абадӣ, дустӣ ва ҳамкорӣ ба имзо расид
Шараф Шерализода дар иҷлосияи 59-уми Шурои ҳуқуқи инсони СММ иштирок намуд