Муаррифии имкониятҳои тиҷоратию сармоягузории Тоҷикистон дар ИМА
![](https://khovar.tj/wp-content/uploads/2016/03/tekst_SHMA.jpg)
Душанбе, 01.03.2016 (АМИТ «Ховар»).- 29 феврали соли 2016 Сафорати Ҷумҳурии Тоҷикистон дар Иёлоти Муттаҳидаи Амрико дар ҳамкорӣ бо созмони Washington Intergovernmental Professional Group ва Дафтари мусоидат ба рушди тиҷорат дар Маркази тиҷорати байналмилалии Бинои Роналд Рейган (Ronald Reagan Building and International Trade Center) чорабинии махсус бо иштироки доираҳои тиҷоратӣ, илмӣ-тадқиқотӣ ва расмии ИМА барои муаррифии имкониятҳои тиҷоратӣ — сармоягузории Тоҷикистон барпо намуд.
Зимни чорабинӣ ба иштирокдорон оид ба имкониятҳои сармоягузорӣ дар Тоҷикистон, бахусус оид ба захираҳои обӣ-энергетикӣ, коммуникатсионӣ, сайёҳӣ ва бахши кишоварзӣ қишлоқ маълумот манзур карда шуд. Дар ин самт ташаббусу иқдомҳои Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид шуданд. Аз ҷумла, се ҳадафи стратегии Тоҷикистон: таъмини истиқлолияти энергетикӣ, раҳоӣ аз бунбасти коммуникатсионӣ ва ҳифзи амнияти озуқаворӣ шарҳ дода шуд.