«Шабе дар фойтун», “Иттифоқи журналистон на Лоҳутӣ бурду на Лоҳутӣ дод”, “То даме ки рисолаҳо тоҷикӣ дифоъ нашаванд…” – шарҳи матбуот

Март 17, 2016 11:33

Душанбе, 17.03.2016 (АМИТ «Ховар»). – “То даме ки рисолаҳо тоҷикӣ дифоъ нашаванд…”- таҳти ҳамин сарлавҳа нашрияи расмии «Ҷумҳурият» дар шумораи рӯзи сешанбе аз 15-уми марти соли равон мақолаи устоди Донишгоҳи миллӣ Муҳаммаддовуд Саломовро нашр кардааст. Муаллиф мақолаи мазкурро ба муносибати мулоқоти дар пешистодаи Президенти мамлакат муҳтарам Эмомалӣ Раҳмон бо зиёиёни кишвар иншо карда, таъкид намудааст: “…агар диссертатсияҳои илмӣ бо забони тоҷикӣ таълиф ва ҳимоя гарданд, аксарияти масоил ва мушкилоти мавҷудаи ҳаёти сиёсию иҷтимоӣ ва иқтисодию фарҳангӣ дар Тоҷикистон ҳалли худро меёбанд, бо ин далел, ки дар Тоҷикистон ба масъалаи рушди илм аз ҷониби роҳбарияти сиёсии кишвар ва махсусан Пешвои миллат, Президенти мамлакат муҳтарам Эмомалӣ Раҳмон таваҷҷуҳи хосса зоҳир мегардад”.

Дар шумораи навбатии “Ҷумҳурият” аз 16-уми марти соли равон матни суханронии Эмомалӣ Раҳмон, Президенти Ҷумҳурии Тоҷикистон зимни мулоқот бо роҳбарон ва фаъолони ноҳияи Рӯдакӣ бо сарлавҳаи “Пешвои миллат: “Сокинони ноҳияи Рӯдакӣ дар ободии Ватани маҳбубамон саҳми арзанда доранд” нашр шуда, аз мулоқоти Сарвари давлат бо роҳбари ширкатии чинии “Поли Технолоҷи” Ван Лин ва ба қабули Пешвои миллат пазируфта шудани директори агентии иттилоотии Русия “ТААС” Сергей Михайлов ва муовини аввали ӯ Михаил Гусман, ҳамчунин дигар навгониҳои ҳаёти сиёсию иҷтимоии кишвар хабару гузоришҳо пешкаши хонандагон гардидаанд.

Шумораи имрӯзаи “Ҷумҳурият” оид ба сафари расмии Президенти мамлакат Эмомалӣ Раҳмон ба Аморати Муттаҳидаи Араб, таъйиноти кадрӣ дар сохторҳои Прокуратураи генералӣ, ВКД ва Кумитаи андоз, ба имзо расидани як зумра қонунҳо иттилоияи расмӣ нашр карда, мусоҳибаи худро бо Прокурори генералӣ Раҳмон Юсуф бо номи “Гаравидан ба ҷараёнҳои ифротӣ нишони нодониву гумроҳист” ба нашр расонидааст.

Шумораи навбатии нашрияи парлумонии «Садои мардум» аз 14-уми марти соли равон матни Қарори Маҷлиси миллии Маҷлиси Олии Ҷумҳурии Тоҷикистон оид ба ҳисоботи Прокурори генералии Ҷумҳурии Тоҷикистон “Дар бораи назорати риояи дақиқ ва иҷрои якхелаи қонунҳо дар қаламрави Ҷумҳурии Тоҷикистон дар соли 2015”, қарорҳои Маҷлиси миллии Маҷлиси Олии Ҷумҳурии Тоҷикистон дар хусуси ба категорияи шаҳр мансуб донистани ноҳияи Ҳисор ва оид ба тағйир додани номҳои ноҳияҳои Ҷалолиддини Румӣ, Ҷиликӯл, Қумсангир ва Шӯроободи вилояти Хатлон ва матни дигар қарорҳои қабулшудаи Маҷлиси миллии Маҷлиси Олии Ҷумҳурии Тоҷикистонро чоп кардааст.

Дар шумораи имрӯзаи “Садои мардум” Фармони Президенти Ҷумҳурии Тоҷикистон дар бораи ба эҳтиёт рухсат додани хизматчиёни ҳарбӣ ва даъвати навбатии шаҳрвандон ба хизмати ҳарбӣ чоп шудааст. Ҳамчунин дар ин шумора аз мулоқоти Шукурҷон Зуҳуров бо раисони ҳар ду палатаи парлумони Покистон гузориши пурраи котиби матбуотии Маҷлиси намояндагони Маҷлиси Олии Ҷумҳурии Тоҷикистон М. Султонов аз Исломобод пешкаши хонандагон шудааст.

«Адабиёт ва санъат» — дар саҳифаи назми ҳафтанома шеърҳои наврӯзии Нурмуҳаммад Ниёзӣ, Муҳаммадалии Аҷамӣ, Раънои Мубориз, Озар, Беҳрӯзи Забеҳулло, Асрори Сомонӣ ва дар саҳифаи наср ҳикояи Константин Паустовский «Шабе дар фойтун» —ро пешкаши мухлисон кардааст.

«Ҷавонони Тоҷикистон» мақолаи “Рангорангиҳои Наврӯзи Бадахшон”-ро нашр кардааст.

Ҳафтаномаи «Тоҷикистон» мақолаҳои таҳлилӣ, танқидӣ ва тадқиқотии “Иттифоқи журналистон на Лоҳутӣ бурду на Лоҳутӣ дод”, “Бозори Шоҳмансур- гӯр сӯзаду дег ҷӯшад”, “Гранатомёт дар Симиганҷу Гулбутта”, “Кризис ва фоҳишаҳо”, “Наврӯз ва ислом” ва дигар маводи ҷолибро нашр кардааст.

“Сарбозони гумном”-и ҷабҳаи ноаён дар хизмати бародарони ҳамзабон”, “Фазилати Фозил”, “Вазорати нақлиёт: аз пайраҳа ба шоҳроҳ” – ин ва дигар мақолаҳоро нашрияи “Фараж” пешкаши хонандагон намудааст.

 

 

 

 

Март 17, 2016 11:33

Хабарҳои дигари ин бахш

Бахшида ба ҷашни Ваҳдати миллӣ Корвони «Модарони ваҳдатсаро» ташкил мегардад
Дар Женева ҳамкорӣ байни Тоҷикистон ва Созмони байналмилалии меҳнат баррасӣ гардид
То соли 2028 ба ҳама шаклҳои бадтарини меҳнати кӯдакон дар Тоҷикистон хотима дода мешавад
Муовини Сарвазир бо рафти корҳои сохтмонии манзилҳои зист барои оилаҳои аз заминҷунбӣ зарардидаи ноҳияи Рашт шинос шуд
Барои дар тобистон ба бемории дарунравӣ гирифтор нашудани кӯдакон чӣ бояд кард?
Даври сеюми Озмуни ҷумҳуриявии «Тараннуми Ватан» баргузор мегардад
Беш аз 190 ҳазор нафар наврасони вилояти Хатлон ба истироҳатгоҳҳо фаро гирифта мешаванд
«ТОБИСТОН-2025». Дар Тоҷикистон беш аз 250 ҳазор кӯдакону наврасон ба истироҳат фаро гирифта мешаванд
РӮЗИ ҶАҲОНИИ ЯХМОС. Чаро ин ширинии яхбастаро аз ҳама зиёд кӯдакон дӯст медоранд?
ҒИЗОИ СОЛИМ. Ҷаҳон Азонов: «Истеъмоли нодуруст ва аз меъёр зиёди ғизо давомнокии умрро кӯтоҳ мекунад»
Дар Бохтар бинои нави Беморхонаи бемориҳои дил ва маркази эндокринология сохта мешавад
САРФАКОРӢ — БАРАКАТИ ЗИНДАГӢ. Ба миқдори сари сӯзан сарфа кардани зан баракатро дар хонадон дучанд меафзояд