8 соли маҳрумият аз озодӣ барои нашъаҷаллобӣ

Душанбе, 19.04.2016. /АМИТ «Ховар»/. Бино ба маълумоти Маркази матбуоти Прокуратураи генералии Ҷумҳурии Тоҷикистон  аз тарафи  мақомоти мазкур парвандаи ҷиноятӣ нисбат ба Муродов Фирӯз Хуршедович бо моддаи 200, қисми 3, бандҳои «в», «г» Кодекси ҷиноятии Ҷумҳурии Тоҷикистон бо тасдиқи фикри айбдоркунӣ барои моҳиятан баррасӣ намудан ба суд фиристода шуда буд.

Ф.Х. Муродов барои он айбдор  гардид, ки 14 январи соли 2016, тахминан соати 11,  дар ноҳияи Ёвон, кӯчаи Ҷавонӣ, дар қабати шоҳроҳи мошингарди Ёвон  Душанбе ҳангоми ба харидори шартӣ барои фурӯш пешниҳод намудани 1260  грамм воситаи нашъадори навъи ҳашиш аз ҷониби кормандони милитсия дастгир  ва аз дасти ӯ ин воситаи нашъадор ёфт гардид.

Бо ҳукми Суди ноҳияи Исмоили Сомонии шаҳри Душанбе  аз 1 апрели соли 2016  Ф.Х. Муродов бо моддаи  мазкур    гунаҳгор дониста шуда, ба ӯ ҷазо дар намуди маҳрум сохтан аз озодӣ  ба муҳлати 8 сол бо нигоҳ доштан дар   муассисаи ислоҳии дорои низоми пурзӯр таъйин гардид.