Бунёди корхонаҳои азими саноатӣ дар Хатлон ба муносибати 25-умин солгарди Истиқлолияти давлатӣ

Душанбе, 18.04.2016 /АМИТ «Ховар/. Бахшида ба таҷлили 25-умин солгарди Истиқлолияти давлатии Ҷумҳурии Тоҷикистон дар моҳҳои наздик бо ҷалби сармояи мустақим корхонаи истеҳсоли семент бо иқтидори 1 миллиону 200 ҳазор тонна, корхонаи гаҷкартон бо иқтидори истеҳсолии се миллион дона, корхонаҳои истеҳсоли криолит, алюминийи фтордор ва кислотаи сулфат дар ноҳияи Ёвони вилояти Хатлон мавриди баҳрабардорӣ қарор хоҳад гирифт.

Ба иттилои масъулини Кумитаи давлатии сармоягузорӣ ва идораи амволи давлатии Тоҷикистон, то рӯзҳои таҷлили ин ҷашни бузурги миллӣ ҳамчунин бакорандозии корхонаи ресандагӣ бо иқтидори коркарди 52 ҳазор тонна нахи пахта дар ноҳияи Данғара, Корхонаи ресандагӣ бо иқтидори коркарди 4 ҳазор тонна нахи пахта дар ноҳияи Фархор, қитъаи роҳи оҳани Ваҳдат-Ёвон ва дигар иншооти муҳими саноатӣ дар назар дошта шудааст.