Дар Душанбе ҳамоиши ҳунармандон доир мегардад

Душанбе, 19.04.2016. /АМИТ «Ховар»/. Дар шаҳри Душанбе 21 апрели соли равон бинобар ба охир расидани Лоиҳаи «Ҳунармандӣ ва соҳибкорӣ ба воситаи ҳамгироии минтақавӣ ва савдои боадолат», ки аз ҷониби Иттиҳоди Аврупо (ИА) маблағгузорӣ мегардад, ҳамоиши ниҳоӣ таҳти унвони «Ояндаи бахши ҳунармандии Тоҷикистон» баргузор мегардад.
Лоиҳаи мазкур аз ҷониби Ассотсиатсияи миллии соҳибкории хурду миёнаи Ҷумҳурии Тоҷикистон, Иттифоқи ҳунармандони Тоҷикистон ва Бизнес-клуби Бишкек дар ҳамкорӣ бо Ташкилоти ғайридавлатии итолиёвии Cesvi барои рушд ва ҳамгироии минтақавии ташкилотҳои тиҷоратии миёнарав (ТТМ) ва корхонаҳои хурду миёна (КХМ) дар бахшҳои ҳунармандии Тоҷикистон ва Қирғизистон амалӣ мегардад.
Ҳангоми амалишавии лоиҳаи мазкур кӯшиш ба харҷ дода шудааст, ки бахшҳои хусусии тоҷику қирғиз тавассути баланд бардоштани иқтидор ва расонидани кумак ба корхонаҳои хурду миёнае, ки (КХМ) дар бахши ҳунармандӣ фаъолият мекунанд, рушд намоянд.
Иштирокдорони ҳамоиш зикр намуданд, ки лоиҳа ба охир расида истодааст ва таҷрибаҳои аз он омӯхташуда барои минбаъд саҳм гузоштан дар рушди бардавоми бахши ҳунармандӣ мусоидат хоҳад намуд.
Дар ҳамоиш ҳамчунин маҳсулоти аъзои Иттифоқи ҳунармандони Тоҷикистон ба намоиш ва фурӯш гузошта мешаванд.