«Ҳимояи манфиатҳои миллӣ ва таҳкими истиқлолияти сиёсӣ дар шароити ҷаҳонишавӣ» — конфронси илмӣ-амалӣ

Душанбе, 26.04.2016 /АМИТ «Ховар»/. 6 июни соли равон дар шаҳри Душанбе бахшида ба таҷлили 25-солагии Истиқлолияти давлатии Ҷумҳурии Тоҷикистон конфронси ҷумҳуриявии илмӣ-амалӣ таҳти унвони «Ҳимояи манфиатҳои миллӣ ва таҳкими истиқлолияти сиёсӣ дар шароити ҷаҳонишавӣ» доир мегардад.
Дар конфронс олимон, мутахассисон ва намояндагони идораҳои марбутаи давлатӣ, вазорату муассисаҳо, ташкилотҳои байналмилалӣ, институтҳои илмӣ-таҳқиқотӣ, мактабҳои олии ҷумҳурӣ, ташкилотҳои ҷамъиятӣ ва ВАО метавонанд иштирок намоянд.
Маърӯзаҳое, ки дар конфронс шунида мешаванд, бояд ба масъалаҳои истиқлолияти сиёсӣ ва худшиносии миллӣ, равандҳои муосири геополитикӣ ва таъсири онҳо ба Осиёи Марказӣ, мушкилоти ҳимояи манфиатҳои миллӣ дар замони ҷаҳонишавӣ, таҳдиду хатарҳои муосир дар минтақаи Осиёи Марказӣ, ҳимояи манфиатҳои геофарҳангӣ, геоиқтисодӣ ва геополитикии Тоҷикистон дар шароити ҷаҳонишавӣ, муқовимат бар зидди терроризму радикализми динӣ ҳамчун омили тақвияти истиқлолият, нақши ҷомеаи шаҳрвандӣ ва ВАО дар таҳкими истиқлолияти сиёсӣ ва иқтисодӣ дар шароити ҷаҳонишавӣ, дурнамои ҳамкории кишварҳои Осиёи Марказӣ бо ИМА ва Иттиҳоди Аврупо дар таҳкими амнияти минтақа, масъалаҳои муҳими сиёсати хориҷии Тоҷикистон дар замони ҷаҳонишавӣ, мушкилот ва дурнамои муқобалаи геополитикии абарқудратҳо дар Осиёи Марказӣ мутобиқ бошанд.
Маърӯзаҳо ва дархостҳоро барои иштирок дар конфронс то 15 майи соли равон ба почтаи электронии rustam86@hotmail.com ирсол намоед.
Хоҳишмандон барои гирифтани маълумоти иловагӣ метавонанд ба Институти фалсафа, сиёсатшиносӣ ва ҳуқуқи Академияи илмҳои Ҷумҳурии Тоҷикистон муроҷиат намоянд.