Соҳибони терминалҳои низоми пардохт бояд иҷозатномаи БМТ гиранд

Душанбе, 7.04.2016 /АМИТ «Ховар»/. Дар Тоҷикистон дар оянда операторони терминалҳо, ки бо низоми пардохт фаъолият мекунанд, бояд иҷозатномаи Бонки миллии Тоҷикистонро гиранд. Дар иртибот ба ин вакилони палатаи поёнии Парлумони Тоҷикистон пешниҳоди Ҳукумати Ҷумҳурии Тоҷикистонро дар мавриди ворид намудани тағйиру иловаҳо ба Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият» қабул намуданд.
Ҷамшед Нурмуҳаммадзода, раиси Бонки миллии Тоҷикистон зимни тавзеҳи ин масъала гуфт, ки тағйирот ба қонуни мазкур бо мақсади таъмини шаффофияти фаъолияти терминалҳои низоми пардохт, пурзӯр намудани назорат аз болои онҳо ва дар ин самт бо иловапардохт ғанӣ гардонидани буҷети кишвар ворид карда шудааст. Ҳамзамон Ҷамшед Нурмуҳаммадзода афзуд, ки алҳол дар баррасии Ҳукумати мамлакат лоиҳаи Қонун «Дар бораи низоми пардохт ва хизматрасонии пардохт» қарор дорад. Инчунин дар ҷумҳурӣ 3 900 нафар шахсони ҳуқуқӣ, воқеӣ ва ташкилотҳои қарзӣ бо терминалҳои худкори низоми пардохт, ки дар ҷойҳои ҷамъиятӣ гузошта шудааанд, фаъолият доранд.
Ҳамзамон ворид намудани тағйирот ба лоиҳаи Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият» ба ташкилотҳои қарзии кишварамон низ марбут аст. Тибқи ин тағйирот ташкилотҳои қарзии хурд ва маблағгузории хурди ҷумҳурӣ муваззаф мегарданд, ки дар мавриди хизматрасонӣ ба муштариён тибқи низоми бонкдории исломӣ бояд иҷозатномаи махсуси Бонки миллии Тоҷикистонро гиранд.
Мавриди зикр аст, ки Парлумони Тоҷикистон ду сол муқаддам, аниқтараш соли 2014 қонун дар бораи бонкдории исломиро қабул намуд буд, ки тибқи он бонкҳои исломӣ имкон доранд дар Тоҷикистон равзана ва намояндагиҳои худро боз намуда, фаъолият намоянд.