«Тоҷикстандарт»: Бо усулҳои нави муошират малакаи худро такмил диҳед

Душанбе, 21.04.2016 /АМИТ «Ховар»/. Имрӯз дар Маркази «Тоҷикстандарт»-и вилояти Хатлон машварати омӯзишӣ дар мавзӯи «Кодекси одоби хизматчии давлатии Ҷумҳурии Тоҷикистон» баргузор гардид.
Мақсади ташкили ин ҳамоишро роҳбари марказ Диловар Пирназарзода чунин баён кард: «Имрӯз талаботи маънавии ҷомеаи муосир нисбат ба хизматчии давлатӣ аз муомилаи эҳтиромона бо шаҳрвандон иборат аст. Бинобар ин, машварат бештар хусусияти амалияро дар бар гирифта, иштирокдорон имконият пайдо менамоянд, ки бо усулҳои нави муоширати одилона малакаи худро такмил диҳанд».
Ҳамзамон дар машварат коршиносони соҳа усулҳои асосии одоби хизмати давлатӣ, қоидаҳои рафтори хизматчии давлатӣ ҳангоми амалӣ намудани фаъолияти хизматӣ ва ғайрихизматӣ, шаклҳои одоби муносибати хизматӣ ва ғайрихизматӣ, аҳамияти одоби муоширатро шарҳу тафсир дода, оид ба фаъолияти Комиссияи одоби марказ сухан гуфтанд.
Баргузории чунин машваратҳо татбиқи сиёсати Пешвои миллат муҳтарам Эмомалӣ Рахмонро дар маҳал дуруст амалӣ хоҳад кард,- афзуд роҳбари Марказ Диловар Пирназарзода.