4 нафар корманди мақомоти корҳои дохилӣ ҷазои интизомӣ гирифтанд

Душанбе, 26. 05. 16. /АМИТ «Ховар»/. Вазорати корҳои  дохилии Тоҷикистон дар пайи  қазияи  Иди миллии мардуми Ҳиндустон «Ҳолӣ» нисбат ба 4 нафар корманди мақомоти корҳои дохилӣ ҷазои интизомӣ татбиқ намуд. Тавре ки  сомонаи расмии вазорати мазкур хабар медиҳад, 15 майи соли равон Ширкати «Дели — Дарбанд» дар ҳамкорӣ бо ҷамъияти «Динамо»-и ВКД чорабинии Иди миллии мардуми Ҳиндустон «Ҳоли»-ро дар майдони Спитамен гузаронида, пеш аз анҷом додани ин маҳфил рӯйю мӯй ва либосҳои ҷавононро ранг карда, намуди зоҳирии онҳоро даҳшатангез намуданд. Гарчанде кормандони милитсия, ки тартиботро назорат мекарданд, онҳоро огоҳ намуданд, ки бо чунин намуди зоҳирӣ дар кӯча ҳаракати оммавӣ накунанд.
Лекин баъди анҷоми маросими «Ҳолӣ» теъдоди 40-50 нафари наврасону ҷавонон бо сару рӯй ва либосҳои бетартибона рангкардашуда, дар ҳудуди театри «Лӯхтак», кӯчаи Бухорои хиёбони Рӯдакӣ ва атрофи он ҳаракат карда, ба қисмати роҳи нақлиётгард баромада, тартиботи ҷамъиятиро дағалона вайрон намуданд.
Чунин амалу рафтори ҷавонон боиси ноҷӯрӣ ва изтиробу ташвиши сокинон ва раҳгузарони шаҳри Душанбе гардид. Баъди муроҷиати зиёди шаҳрвандон оид ба гаштугузори ҷавонони шубҳанок 48 нафар, аз ҷумла 31 нафар ноболиғ ва 17 нафар ҷавон боздошт ва ба шуъбаи ВКД дар ноҳияи И. Сомонӣ дастрас карда шуданд.
Баъди тартиб додани ҳуҷҷатҳои зарурӣ ва суҳбат бо волидон онҳо ҷавоб дода шуданд.
Чораҷӯӣ ва амали кормандони милитсия тибқи талаботи қонун буда, пешгирӣ накардани чунин ҳолат метавонист боиси ноҷӯрӣ ва бетартибӣ гардад.
Бинобар дағалона рафтор намудани кормандони милитсия, баъди санҷиши хизматӣ аз ҷониби Раёсати амнияти дохилии ВКД нисбат ба 4 нафар корманди мақомоти корҳои дохилӣ ҷазои интизомӣ татбиқ карда шуд, аз ҷумла, 1 нафар аз вазифа озод ва се нафар танбеҳ ва танбеҳи қатъӣ гирифтанд.
Таҳкими суботу оромӣ, риояи талаботи қонун ва меъёрҳои ахлоқӣ асоси амнияту осоиштагӣ ва муҳити созгор дар ҷомеа ба ҳисоб рафта, дар ин замина кормандони мақомоти корҳои дохилӣ талошу кӯшиш зиёд ба харҷ медиҳанд.