Ҷаласаи Шӯрои миллии кор бо ҷавонон ба кори худ оғоз кард

Душанбе, 27.05.2016 /АМИТ «Ховар»/. Имрӯз дар Китобхонаи миллии Тоҷикистон нахустин ҷаласаи Шӯрои миллии кор бо ҷавонон дар назди Президенти Ҷумҳурии Тоҷикистон таҳти раёсати Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон, Раиси Шӯрои миллии кор бо ҷавонон муҳтарам Эмомалӣ Раҳмон ба кори худ оғоз намуд. Сарвари давлат Эмомалӣ Раҳмон зимни оғози ҷаласа аъзои Шӯро ва тамоми ҷавонони кишварро бори дигар бо Рӯзи ҷавонон табрик намуд.
Ба рӯзномаи ҷаласа се масъала ворид шудааст:
1. Суханронии раиси Шӯро, Президенти Ҷумҳурии Тоҷикистон Эмомалӣ Раҳмон;
2. Маълумоти котиби Шӯро вобаста ба нақш ва иштироки ҷавонон дар ҳаёти ҷомеа ва дастовардҳои ҷавонон;
3. Баррасии нақшаи Шӯро барои давраи моҳҳои июн-декабри соли 2016.
Доир ба масъалаи дуюм- иштироки ҷавонон дар ҳаёти сиёсию иқтисодӣ ва иҷтимоӣ дар замони истиқлолият раиси Кумитаи ҷавонон, варзиш ва сайёҳии  Ҷумҳурии Тоҷикистон  ва ҳамзамон котиби шӯро  Аҳтам Абдуллозода сухан гуфт.
Ёдовар мешавем, ки 18 июли соли 2015 Шӯрои миллии кор бо ҷавонон дар назди Президенти Ҷумҳурии Тоҷикистон  таъсис дода шуд, ки 43 нафар аъзо дорад.
Мақсади таъсиси Шӯро дастгирӣ намудани сиёсати ҷавонон ва фароҳам овардани шароити мусоиди кору таҳсил барои ҷавонон мебошад.