Барномаи маҷмӯии рушди тарбияи ҷисмонӣ ва варзиш дар Хатлон натиҷагирӣ шуд

Душанбе, 13.05.2016 /АМИТ «Ховар»/. Дар шаҳри Қурғонтеппа ҷаласаи Шӯрои рушди тарбияи ҷисмонӣ ва варзиши мақомоти иҷроияи ҳокимияти давлатии вилояти Хатлон баргузор гашт, ки дар он иҷрои «Барномаи маҷмӯии рушди тарбияи ҷисмонӣ ва варзиш барои солҳои 2011-2015» мавриди муҳокима қарор гирифт.
Махфират Хидирзода, муовини раиси вилоят ва раиси Шӯро зикр намуд, ки варзиш дар баробари ташвиқу тарғиби тарзи ҳаёти солим, инчунин яке аз воситаҳои беҳтарини таҳкими дӯстӣ миёни инсонҳо ва як василаи пешгирӣ аз оворагардию вақтро беҳуда сарф намудани наврасону ҷавонон мебошад.
Шаҳзод Раҳимов, сардори Раёсати ҷавонон, варзиш ва сайёҳии вилоят дар бораи иҷрои «Барномаи маҷмӯии рушди тарбияи ҷисмонӣ ва варзиш барои то соли 2015» иттилоъ дод, ки тайи панҷ соли гузашта барои татбиқи ин барнома аз ҳисоби бақияи озод ва фонди захиравии раиси вилоят 5 миллиону 36 ҳазору 500 сомонӣ ихтисос дода шуда, дар маҷмӯъ, дар маҳалҳо ва ташкилоту муассисаҳои вилоят 160 майдони варзишӣ, 103 толори махсуси варзишӣ бунёд ва мавриди баҳрабардорӣ қарор гирифтааст.
— Инчунин дар шаҳру ноҳияҳои вилоят тайи солҳои 2011-2015 ба маблағи 124,8 миллион сомонӣ се маҷмааи варзишӣ, 445 толор, як маркази табобатии варзишӣ, 9 ҳавзи шиноварӣ, ду майдони теннис, 16 варзишгоҳ, 535 майдончаи варзишӣ аз рӯйи намуди футбол, баскетбол ва волейбол, 183 иншооти махсуси варзишии фитнес ва билярд сохтаю таъмир гардида, феълан истифода мешаванд, — афзуд Шаҳзод Раҳимов.
Мавсуф ҳамчунин иттилоъ дод, ки дар вилоят ҳоло сохтмони се маҷмаа ва 8 толори варзишӣ, 5 варзишгоҳу 73 майдончаи варзишӣ ба маблағи 56,7 миллион сомонӣ идома дорад.