Дар АНМН 374 кг маводи нашъаовар сӯзонида шуд

Душанбе, 27.05.16. /АМИТ «Ховар»/.  27 май дар арафаи Рӯзи таъсиси Агентии назорати маводи нашъаовари назди Президенти ҶТ, дар бухории ин идора қариб 374 кг маводи нашъаовар сӯзонида шуд.
Тавре ки ба АМИТ «Ховар» аз маркази матбуоти агентии мазкур хабар доданд, дар ҳузури Комиссияи махсус аз ҳисоби намояндагони мақомоти прокуратура, суд, сохторҳои ҳифзи ҳуқуқ, намояндагони воситаҳои ахбори оммаи ватанию хориҷӣ 374 килограмму 045 гр маводи нашъаовар, аз ҷумла: 16 кг 452 гр героин, 161 кг 699 гр афюн, 107 кг 511 гр ҳашиш, 88 кг 376 гр бангдона ва 21 ҳабби МДМА аз рӯи 31 парвандаи ҷиноӣ, ки нисбат ба онҳо ҳукми суд баромадааст, сӯзонида шуданд.
Маводи нашъаовари мазкур аз тарафи кормандони Агентии назорати маводи нашъаовари назди Президенти ҶТ, Кумитаи давлатии амнияти миллӣ, Хадамоти гумрук ҳангоми гузаронидани амалиёти фаврию ҷустуҷӯӣ мусодира гардида буданд.
Дар давоми понздаҳ соли охир дар бухории агентӣ зиёда аз 15 тонна маводи нашъаовар сӯзонида шудааст.