Дар Гулистон ба истиқболи ҷашни 25-солагии Истиқлолияти давлатӣ 8 коргоҳ фаъол гардид

Гулистон, 04.05.2016 /АМИТ «Ховар»/. Дар доираи таҷлили 25-солагии Истиқлолияти давлатии Ҷумҳурии Тоҷикистон дар шаҳри барқчиёни вилояти Суғд — шаҳри Гулистон то ин дам 8 коргоҳи истеҳсолӣ, аз ҷумла коргоҳи истеҳсоли кабел, маҳсулоти хӯрокворӣ, қаннодиву нонпазӣ ва истеҳсоли маҳсулоти нимтайёр ба фаъолият шурӯъ карданд.
Тавре аз Хадамоти иттилоотии шаҳри Гулистон Рустам Одизода ба АМИТ «Ховар» хабар дод, дар давраи семоҳаи аввали соли равон ба иқтисодиёти хоҷагии халқи шаҳр ба андозаи 125,7 млн. сомонӣ инвеститсияҳо ҷалб карда шуданд, ки аз он 64,0 млн. сомонӣ сармояи хориҷӣ ва 61,7 млн. сомонӣ сармояи дохилӣ ба ҳисоб меравад.
Ҳамзамон тибқи нақшаи чорабиниҳои мақомоти шаҳрӣ дар арафаи рӯзҳои таҷлили ҷашни 25 солагии Истиқлолияти Тоҷикистон ба истифода додани боз 5 корхонаи нав пешбинӣ гардидааст.
Коргоҳи истеҳсоли хокаи мис ва нуқра дар заминаи ҶДММ «Шӯҳрат-2005» бо ташкили 58 ҷойи нави корӣ, коргоҳи коркарди мева бо иқтидори 7,2 тонна бо ташкили 10 ҷои корӣ, коргоҳи истеҳсоли мебел бо ташкили 14 ҷои корӣ, комплекси парвариши чорвои калони шохдор бо иқтидори истеҳсоли 500 кг гӯшт дар як моҳ, коргоҳи истеҳсоли орд бо ташкили 8 ҷои нави корӣ ва ҳамчунин як ошхонаи миллӣ дар маркази шаҳр аз ин шуморанд.