Дар Тоҷикистон истихроҷи нафту ангиштсанг ва маводи ғайримаъдании бинокорӣ афзоиш ёфт

Душанбе, 03.05.2016. /АМИТ «Ховар»/. Агентии омори назди Президенти ҶТ хабар медиҳад, ки дар семоҳаи аввали соли равон истихроҷи нафту ангиштсанг, маводи ғайримаъдании бинокорӣ, истеҳсоли ҳасиб, панири равғанин, маҳсулоти шири холис, афшураи помидор, нўшокиҳои беспирт, оби ҷав, коняк, тамоку, қолин ва маснуоти қолинӣ, пойафзол, истеҳсоли пўст, қоғаз, собуни хоҷагӣ ва мушкин, семент, гаҷ, плитаҳои мармарин, хишти бинокорӣ, арматураи сохтмонӣ, трансфарматорҳо, маснуоти кабелӣ, маснуот аз металопластика ва ғайраҳо афзудаанд.
Дар семоҳаи якуми соли 2016 дар ҷумҳурӣ ба маблағи беш аз 2 млрд. (2996,5млн.) сомонӣ маҳсулоти саноатӣ истеҳсол карда шудааст.
Бино ба маълумоти Агентии омори назди Президенти ҶТ, нисбат ба ҳамин давраи соли 2015 индекси ҳаҷми истеҳсоли маҳсулоти саноатӣ 113,1 фоизро ташкил кард. Дар моҳи марти соли 2016 ба маблағи беш аз як млрд. (1034,1 млн.) сомонӣ маҳсулоти саноатӣ истеҳсол карда шудааст, ки аз сатҳи моҳи марти соли 2015 ба андозаи 19,1 фоиз баланд аст.
Дар саноати истихроҷ ҳаҷми истеҳсолот 460,9 млн. сомонӣ, саноати коркард зиёда аз 1 млрд.(1774,4 млн.) сомонӣ, дар истеҳсолу тақсимоти неруи барқ, газ ва об беш 761 млн. сомониро ташкил дод.
Дар семоҳаи якуми соли 2016 аз 2011 корхонаи саноатии ҳисоботдиҳанда миқдори корхонаҳои бозистода 869 воҳид ё 43,2 фоизро ташкил кард.
Ҳамзамон истеҳсоли маснуоти макаронӣ, равғани растанӣ, маснуоти қаннодӣ, обҳои маъданӣ, нахи пахта, чигити пахта, калобаи пахтагин, газворҳо, маснуоти ҷӯробу пайпоқ, бензин, сӯзишвории дизелӣ, асфалт, қир, оҳаки бинокорӣ, оҳану бетони васлшаванда, мех, истеҳсоли неруи барқ, қувваи ҳароратӣ ва ғайра кам шудааст.