Дидори сафири Тоҷикистон бо Раиси Маҷлиси намояндагони Миср

Душанбе, 17.05.2016 /АМИТ Ховар/. 16 майи соли равон дар Қоҳира Раиси Маҷлиси намояндагони Ҷумҳурии Арабии Миср Алӣ Абдулъол сафири Ҷумҳурии Тоҷикистон Хусрав Нозириро ба ҳузур пазируфт. Сафири кишвари мо ба Раиси Маҷлиси намояндагони Миср паёми табрикии Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуровро расонид.

Алӣ Абдулъол бо изҳори ташаккур аз паёми табрики ҳамтои тоҷики худ таъкид намуд, ки Миср ва Тоҷикистонро муносибатҳои дерини таърихиву фарҳангӣ бо ҳам мепайванданд. Ӯ афзуд, ки Миср хоҳони густариши муносибатҳои ҳамкорӣ бо Тоҷикистон дар ҳамаи соҳаҳо мебошад. Ӯ изҳори умедворӣ намуд, ки парлумонҳои ду кишвар аз тариқи таъсис додани гурӯҳҳои дӯстии Мисру Тоҷикистон ҳамкории дуҷонибаро барқарор карда, аз мубодилаи боздидҳои ҳайатҳои намояндагони мардумӣ аз кишварҳои ҳамдигар истиқбол хоҳанд намуд.