Кӯлоб: ҲХДТ ҷонибдори иқдомҳои созанда аст

Кӯлоб, 26.05.2016  /АМИТ «Ховар»/. 26 май дар боғи фарҳангию фароғатии шаҳри Кӯлоб бахшида ба Рӯзи ҷаҳонии Салиби Сурх ва Ҳилоли Аҳмар, Ҷамъияти Ҳилоли Аҳмари Тоҷикистон (ҶҲАТ) дар минтақаи Кӯлоб маҳфили фарҳангӣ доир намуд.
Раиси  Кумитаи иҷроияи Ҳизби Халқии Демократии Тоҷикистон дар шаҳри Кӯлоб Саъбагул Валиева кормандони Ҷамъияти Ҳилоли Аҳмари Тоҷикистон дар минтақаи Кӯлоб ва аъзои ин ҷамъиятро бо Рӯзи ҷаҳонии Салиби Сурх табрик гуфта, зикр намуд, ки ҶҲАТ ҳамчун ташкилоти ҷамъиятии мустақил ва соҳибихтиёр дар самти фаъолияти башардӯстона, ба табақаҳои муҳтоҷи аҳолӣ, ки дар натиҷаи вазъи феълӣ ҳаёташон зери таҳдид аст, дар мавриди зарурӣ кумаки беғаразонаашро тавассути аъзо ва ихтиёриёни худ мерасонад.
Дар қисмати фарҳангии чорабинӣ аз тарафи аъзо ва ихтиёриёни ҷамъият озмун оид ба фаъолияти ҶҲАТ, саҳначаҳои ёрии аввал, ташаккули тарзи ҳаёти солим, намоиши рақси миллӣ ва инчунин аз тарафи ҳунармандони шаҳри Кӯлоб сурудҳо дар васфи Ватан, Модар, Тоҷикистон пешниҳод шуданд.