Конибодом: Оила ниҳоди муқаддас

Конибодом, 16.05.2016. /АМИТ «Ховар»/. Дар робита ба Рӯзи байналхалқии оила дар шаҳру ноҳияҳои вилояти Суғд чорабиниҳои мухталиф доир гардиданд. Тавре ки ба АМИТ Ховар масъулин аз шуъбаи кор бо занон ва оилаи мақомоти маҳаллии шаҳри Конибодом иттилоъ доданд, бахшида ба ин санаи хотирмон бо ҷалби се оилаи намунавии шаҳр- оилаи Аҳмедовҳо, Умаровҳо ва Неъматовҳо дар тарабхонаи «Олимиён» маҳфили хотирмон таҳти унвони Оила ниҳоди муқаддас доир гардид.
Дар маҳфил иштирокдорони он, аз ҷумла оилаҳои беҳтарин, ки худ намояндагони касбу кори гуногун буданд, андешаҳои худро оид ба оилаву оиладорӣ, эҳтироми ҳамдигар дар муҳити оила, мустаҳкамии оила ва пешгирии ҳодисаҳои номатлуб, худдорӣ аз никоҳи хешутаборӣ, садоқату вафодорӣ баён дошта, зикр намуданд, ки оила асоси пойдории давлат ва ҷамъият ба ҳисоб рафта, инсоният барои инкишофи ҷомеаи мутамаддин тӯли қарнҳо ҷаҳду талошҳои зиёд варзида, марҳила ба марҳила ба беҳдошти рафтору ахлоқ, одоби бунёди оила ва оиладорӣ, маърифату фарҳанги ҳамзистӣ замина гузошт, ки ин раванд пайваста ташаккул меёбад.