Машқҳои амалию тактикии ХДО дар ДОМ

Хоруғ, 26.05.2016 /АМИТ «Ховар»/. Раёсати хадамоти давлатии оташнишонии ВМКБ дар ҳамкорӣ бо Донишгоҳи Осиёи Марказӣ дар шаҳри Хоруғи ВМКБ машқи муштараки тактикӣ  роҳандозӣ намуданд.  Дар ин машқ се  мошини сӯхторнишонӣ, наздики 40 нафар ҳайати шахсӣ ва бештар аз 300 нафар бинокорони  ин донишгоҳ ширкат варзиданд.
Сардори Раёсати мазкур Анвар Шолангаров гуфт, ки қарор аст соли оянда ин донишгоҳ нахустин донишҷӯёни ватанию хориҷиро ба таҳсил фаро гирад ва аз ин рӯ мо низ зарур донистем, ки қаблан вазъи бехатарӣ аз сӯхторро дар ин иншоот мавриди санҷиш қарор диҳем. Машқи амалӣ нишон дод, ки дар сохтмони мазкур ҳам коргарон ва техникаю воситаҳои дигари сӯхторнишонӣ ба ҳар гуна ҳолатҳои ногаҳонӣ ва ғайриинтизор омода мебошанд, зеро ҳар як идораву муассиса бояд то расидани гурӯҳҳои оташнишонӣ мутобиқ ба имконоту тавони худ дар наҷоти одамону ҷилавгирӣ аз паҳншавии сӯхтор талош намоянд.