Нериё Аминов-шашмақомсарои саршиноси санъати касбии тоҷик

Душанбе, 27.05.2016. /АМИТ «Ховар»/. Бахшида ба 100 -солагии устоди варзидаи Шашмақом Нериё Аминов  29 май дар Театри давлатии академии опера ва балети ба номи С. Айнӣ барномаи консертӣ доир мегардад.
Дар барномаи консертӣ суруду таронаҳои машҳури Нериё Аминов бо номҳои «Париваш», «Боди сабо», «Айёми ишқ», «Ғамгусори ман куҷост», «Ҷилваи Хатлон», «Орзу дорам», «Зулфи парешон», «Ҳамдами дил», «Як табассум», «Нозанин», «Шаҳнози Гулёр» ва «Каъбаи ушшоқ» аз ҷониби ҳунармандон сароида шуда, ансамблҳои рақсии «Зебо», «Базморо» ва «Гулрез» ҳунарнамоӣ мекунанд.
Нериё Аминов  аз зумраи санъаткорони касбии мусиқии тоҷик ба шумор рафта, соли 1916 дар шаҳри Душанбе ба дунё омадааст.  Саҳми Нериё Аминов дар рушди санъати  мусиқии суннатии тоҷикон-Шашмақом назаррас буда, соли 1946 бо унвони фахрии «Артисти хизматнишондодаи РСС Тоҷикистон» қадрдонӣ шудааст.