Низомиёни Ироқ сардори алоқа ва иртиботи ДИ-ро нобуд карданд

Душанбе,12.05.2016 /АМИТ «Ховар» /. Низомиёни Ироқ рӯзи чоршанбе яке аз пешвоёни гурӯҳи террористии ба ном «Давлати исломӣ»- ро, ки масъули алоқа ва иртибот дар созмон буд, нобуд карданд. Дар ин бора Агентии иттилоотии Ироқ хабар додааст.
Амалиёт дар як минтақаи наздишаҳрии шаҳри Ал- Фалуҷӣ, ки аз соли 2013 зери назорати ДИ аст, сурат гирифт.
«Субҳи имрӯз, неруҳои амниятӣ дар маркази минтақаи Ал-карма бар зидди гурӯҳи ҷангиёни ДИ амалиёти ҳарбӣ гузаронида, сардори ба ном алоқаи ДИ дар Ал- Фалуҷӣ ва нуҳ нафар ёрдамчиёни ӯро нобуд сохтанд»,- иқтибос меорад агентӣ аз изҳороти полковник Маҳмуд Мардӣ Ҷумалӣ.