Офати табиӣ ба хоҷагиҳои ноҳияи Файзобод хисорот ворид кард

Файзобод, 12.05.2016 /АМИТ «Ховар»/. Шаби гузашта тахминан соати 12:00 дар натиҷаи бориши зиёди борон ва омадани сел аз дарёчаҳои ҳудуди ҷамоати деҳоти Ҷавонони ноҳияи Файзобод ва дарёи Элок ба хоҷагии мардуми ноҳия зарари зиёди молӣ расид.
Тибқи иттилои раиси ҷамоати мазкур Сафар Раҷабов дар деҳаҳои ҳудуди ҷамоат як хонаи истиқоматӣ, ду пули калони мошингузар ва 7 пули хурди одамгузар, майдони варзишии деҳаи Сари чашма, зиёда аз 1000 бех ниҳоли гуногун, 7 бинои ёрирасон ва 20 километр роҳҳои маҳаллӣ пурра хароб гардиданд ва зиёда аз 50 сар чорвои сокинонро оби сел нобуд кард.
Ҳамчунин оби дарёи Элок ду пули мошингузар ва як пули одамгузари назди муассисаи таҳсилоти умумии №20- и ҷамоати деҳоти ба номи Д. Алиевро хароб кард, ки то таъмир намудани пулҳои мазкур рафтуомади сокинони ҷамоат ба ноҳия ва пойтахти ҷумҳурӣ катъ гардида, як қисми хонандагон натавонистанд ба дарс ҳозир шаванд.