Парлумони Тоҷикистон Созишномаи байни ҳукуматҳои ҶТ ва ШАС-ро ба тасвиб мерасонад

Душанбе,10.05.2016 /АМИТ «Ховар»/. Интизор меравад, ки ояндаи наздик палатаи поёнии Парлумони Тоҷикистон Созишнома байни Ҳукумати Ҷумҳурии Тоҷикистон ва Ҳукумати Шоҳигарии Арабистони Саудӣ (ШАС) оид ба ҳамкорӣ дар соҳаи мубориза бо ҷинояткориро ба тасвиб расонад. Масъалаи мазкур 10 май дар ҷаласаи Шӯрои Маҷлиси намояндагон матраҳ гардид.
Аъзои Шӯро ҳамзамон лоиҳаи қонунҳои Ҷумҳурии Тоҷикистон «Дар бораи ворид намудани тағйирот ба Кодекси мурофиавии ҷиноятии Ҷумҳурии Тоҷикистон», Кодекси ҳуқуқвайронкунии маъмурии Ҷумҳурии Тоҷикистон, Созишнома оид ба маблағгузорӣ байни Ҷумҳурии Тоҷикистон ва Ассотсиатсияи байналмилалии рушд оид ба «Барномаи мутобиқгардонӣ ва кам кардани оқибатҳои тағйирёбии иқлим дар ҳавзаи Баҳри Арал», Созишнома оид ба маблағгузорӣ байни Ҷумҳурии Тоҷикистон ва Ассотсиатсияи байналмилалии рушд оид ба «Лоиҳаи мукаммалгардонии идоракунии молияи давлатӣ-II»-ро баррасӣ намуданд.
Дар фарҷом бархе аз масъалаҳо барои муҳокима ва қабул ба ҷаласаи навбатии иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон даъвати панҷум пешниҳод карда шуд.