Муассисаи давлатии «ТВ-Варзиш» Бозиҳои ниҳоии Чемпионати «Аврупо-2016»-ро мустақиман пахш мекунад

Душанбе, 10.06.2016 /АМИТ «Ховар»/. Муовини аввали директори муассисаи давлатии «ТВ-Варзиш» Парвиз Норов дар робита ба оғози бозиҳои ниҳоии Чемпионати 15-уми Аврупо оид ба футбол дар Фаронса ба хабарнигори «Ховар» иттилоъ дод, ки шабакаи «ТВ-Варзиш» омода аст ҳамаи бозиҳои ЕВРО -2016 ро мустақиман пахш карда, пешкаши мухлисони футболи Тоҷикистон гардонад. Дар ин маврид шартномаҳо бо расонаҳои ҷаҳонӣ ба имзо расидаанд ва кулли шореҳони футболи мамлакат низ барои шарҳ додани бозиҳо ҷалб гардидаанд.
Ин дар ҳолест, ки шабакаи «ТВ-Варзиш» имрӯзҳо пахши мусобиқоти Ҷоми Амрикоро низ мустақиман барои дӯстдорони футбол пешкаш мекунад ва дар баробари ин гузоришҳои мустақиму сабтро аз  Чемпионати мамлакат оид ба футбол низ ба роҳ мондааст. Дар давраи бозиҳои ниҳоии «Ҷоми Аврупо-2016» пахши мустақими дигар чорабиниҳои варзишӣ низ аз назари дастандаркорони «ТВ-Варзиш» дур нахоҳанд монд.