Академияи илмҳои ҶТ: Данғара таърихи 4000 — сола дорад!

Душанбе, 16.07.2016. /АМИТ «Ховар»/. Ҳамаи бозёфтҳои ҳафриётии ноҳияи Данғара аз он шаҳодат медиҳанд, ки ин минтақа беш аз 4 ҳазор сол таърих дорад. Дар ин бора чанд рӯз пеш зимни нишасти матбуотӣ президенти Академияи илмҳои Ҷумҳурии Тоҷикстон Фарҳод Раҳимӣ изҳор дошт.
Бино ба гуфтаи ӯ, экспедитсияҳо дар ин минтақа ҳанӯз дар асри гузашта оғоз гардида буданд ва соли гузашта Академияи илмҳо онҳоро аз сар гирифт. «Мо бозёфтҳои худро ба марказҳои байналмилалии илмӣ, аз ҷумла ба Лондон барои муайян кардани вақти амиқи пайдоиши онҳо равон кардем. Вале ҳоло аллакай маълум аст, ки ҳамаи бозёфтҳои мо аз он шаҳодат медиҳанд, ки бозёфтҳои ҳафриётии дар ноҳияи Данғара пайдокарда беш аз 4 ҳазор сол таърих доранд ва ин ҷо бешубҳа анъанаҳои ҳаёти шаҳрӣ вуҷуд доштанд», — зикр кард президенти АИ ҶТ.
Чанде пеш Ф. Раҳимӣ иттилоъ дода буд, ки ду бозёфт аз Данғара дар Олмон баҳои баланд гирифта, нодир арзёбӣ шуданд. «Дар дигар тамаддунҳои Осиёи Марказӣ чунин бозёфтҳо набуданд», — гуфт ӯ.
Бино ба гуфтаи ӯ, олимон бар он назаранд, ки ин идомаи тамаддуни Саразм буда, беш аз 5,2 ҳазор сол таърих дорад ва ҳоло аниқ нест, ки бо кадом омил аҳоли ин шаҳрро тарк кардааст.
Ф. Раҳимӣ таъкид кард, ки ҳадаф аз бозёфтҳои ҳафриётӣ на эълон кардани 4 ҳазорсолагии Данғара, балки ба ҷаҳониён муаррифи кардани тамаддуни қадимаи мардуми тоҷик ва таҳҷоӣ будани тоҷикон мебошад.