Барои судяҳои тоҷик меъёри синну сол муқаррар карда шуд

Душанбе, 16.07.2016 /АМИТ «Ховар»/. Тибқи тағйиру иловаҳое, ки 15 июл аз ҷониби аъзои палатаи болоии парлумони кишвар ба Қонуни конститутсионии Ҷумҳурии Тоҷикистон «Дар бораи судҳо» қабул карда шуданд, минбаъд судяҳои тоҷик ҳангоми бори аввал ба мансаби судя таъйин шудан бояд дар назди комиссияе, ки Суди Олии ҶТ ташкил кардааст, имтиҳони тахассусӣ супоранд.
Илова бар ин, барои судяҳои тоҷик меъёри синну соли ба нафақа баромадан муқаррар карда шуд: занон дар синни 58 — солагӣ ва мардон дар синни 63 — солагӣ. Чунин маҳдудиятҳоро пештар қонунгузории кишвар дар бар намегирифт.
«Ин тадбир ба ҳуқуқшиносони ҷавон ва ояндадори кишвар роҳ мекушояд», — зикр кард дар баромади худ оид ба ин масъала узви палатаи болоии парлумони кишвар Қаноатшо Лоиқзода.